ЧОНЫМ ПОЧЫН МУРЕНА...

--------------------------------- "ЧОНЫМ ПОЧЫН МУРЕНА" проект коллектив семын 2010-ше ий гыч чумыргаш тӱҥалын. Лач тунам Марий Элын сулло артистше АНАТОЛИЙ ЗАРЕЦКИХ ден Марий Эл кугыжаныш премийын Лауреатше ВОЛОДЯ МАТВЕЕВ у сынан концерт программе-влакым пырля ямдылаш тӱҥалыныт, воктекышт тыгаяк шонымашан вес артист-влакым ушаш шонен пыштеныт: эстраде да калык муро дене пырля шке программышкышт мыскара шӱлышымат шыҥдареныт. Тидын дене у тӱсым пуртеныт. 2011-ше ийыште проектыш Марий Эл тӱвыран сулло пашаеҥже ЭЛЬВИРА ТРИФОНОВА да самырык мурызо ЛИЛИЯ ПЕТУХОВА-БОГОЛЮБОВА ушненыт. 2012-шо ийыште проектыш семмастар да муро автор АРТУР ЕФРЕМОВ ушнен. 2015-ше ийыште АНАТОЛИЙ ЗАРЕЦКИХ проект деч кораҥын, а 2020-шо ийыште уэш пӧртылын. 2015-ше ийыште проектыш Олык Ипай лӱмеш кугыжаныш премийын Лауреатше ИРИНА ЯКАЕВА ушнен. 2015-ше ий гычак проект дене пеҥгыде кылым мурызо ЙОРГА КАЧЕ куча (Москваште ила). 2019-ше ий гыч проектыш мыскараче ВЕРА ГОРОХОВА ушнен. Тудо тӱрлӧ мыскара образым чоҥа, сценкыште модеш, монологым каласкала. "ЧОНЫМ ПОЧЫН МУРЕНА" проектын репертуарыштыже тӱрлӧ кундемлаште илыше марий-влакын муро аршашышт, эстраде муро да дискотеке сем-влак улыт, пытартыш жапыште МЫСКАРА шӱлышат тиде проектын концерт программыштыже утыр ылыжын. Проект вуйлатыше - ВОЛОДЯ МАТВЕЕВ.